Полиелей (валаамский распев)

Хвалите имя Господне, Аллилуия. Хвалите, раби Господа, Аллилуия. Стоящии во храме Господни, во дворах дому Бога Нашего. Хвалите Господа, яко благ Господь, Пойте имени Его, яко добро. Яко Иакова избра себе Господь и Израиля в достояние Себе. Яко аз познах, яко велий Господь и Господь наш Над всеми боги. Вся, елика возхоте Господь, сотвори на небеси на Земли, в морях и во всех безднах, Возводя облаки от последней земли и молнии в дождь Сотвори, Изводя ветры от сокровищ Своих, Иже порази первенцы египетския от человека до скота. Посла знамения и чудеса посреде тебе, Египте, на фараона и на вся рабы его. Иже порази языки многи и изби цари крепки, Сиона, царя Аморрейска, и Ога, Царя Васанска, и вся царствия Ханаанска, И даде землю их достояние, в достояние Израилю, Людям Своим. Господи, имя Твое во веки, память Твоя в род И род. Яко судити имать Господь людем Своим и о рабех Своих умолится. Идоли язык, сребро и злато, дела рук человеческих. Уста имута не возглаголют, очи имута не узрят, Уши имута не услышат, ниже бо есть дух во Устех их. Подобни им да будут творящии я и Вси надеющиися на ня. Доме Израилев, благословите Господа. Доме Аарон, благословите Господа. Доме Левиин, благословите Господа. Боящиися Господа, благословите Господа. Благословен Господь от Сиона, Живый во Иерусалиме, Аллилуия. Исповедайтеся Господеви, Яко благ, Аллилуия, Аллилуия, Яко в век милость Его, Аллилуия. Исповедуйтеся Богу богов, яко в век милость Его. Исповедайтеся Господеви Господей, Яко в век милость Его, Сотворшему чудеса велия Единому, Яко в век милость Его, Сотворшему небеса разумом, яко в век милость Его, Утвердившему землю на водах, яко в век милость Его, Сотворшему светила велие Единому, Яко в век милость Его, Солнце во область дне, яко в век милость Его, Луну и звезды во область нощи, Яко в век милость Его, Поразившему Египет с первенцы его, Яко в век милость Его, И изведшему Израиля от среды их, Яко в век милость Его, Рукою крепкою и мышцею высокою, Яко в век милость Его, Раздельшему Чермное море в разделения, Яко в век милость Его, И проведшему Израиля посреде его, Яко в век милость Его, И истрясшему фараона и силу его в море Чермное, Яко в век милость Его, Проведшему люди своя в пустыни, Яко в век милость Его, Поразившему цари велия, яко в век милость Его, И убившему цари крепкия, яко в век милость Его, Сиона, царя Аморрейска, яко в век милость Его, И Ога, царя Васанска, яко в век милость Его, И давшему землю их в достояние, Яко в век милость Его, Достояние Израилю, рабу Своему, Яко в век милость Его, Яко во смирении нашем помяну ны Господь, Яко в век милость Его, И избавил ны есть от врагов наших, Яко в век милость Его, Даяй пищу всякой плоти, яко в век милость Его. Исповедайтеся Богу Небесному, Аллилуия, аллилуия, Яко в век милость Его, Аллилуия.