Исповедь и завершение молитв (В руце Твои, Господи)

В немощех сущие посети и исцеление даруй. Иже на мори управи. Путешествующим спутешествуй. Православным христианам поборствуй. Служащим и милующим нас грехов оставление даруй. Заповедавших нам, недостойным, молитися о них, Помилуй по велицей Твоей милости. Помяни, Господи, прежде усопших отец и братий наших И упокой их, идеже присещает свет лица Твоего. Помяни, Господи, братий наших плененных и избави я От всякаго обстояния. Помяни, Господи, плодоносящих и доброделающих во Святых Твоих церквах, и даждь им яже ко спасению Прошение и жизнь вечную. Помяни, Господи, и нас, смиренных и грешных, И недостойных раб Твоих, и просвети наш ум светом Разума Твоего, и настави нас на стезю заповедей Твоих, молитвами Пречистыя Владычицы нашея Богородицы и Приснодевы Марии и всех Твоих святых, Яко благословен еси во веки веков. Аминь. Исповедую Тебе, Господу Богу моему и Творцу, Во Святей Троице Единому славимому и покланяемому, Отцу и Сыну и Святому Духу, вся моя грехи, Яже содеях во вся дни живота моего, И на всякий час, и в настоящее время и В прешедшие дни и нощи, делом, Словом, помышлением, объядением, Пьянством, тайноядением, празднословием, Унынием, леностию, прекословием, Непослушанием, оклеветанием, осуждением, Небрежением, самолюбием, многостяжанием, Хищением, неправдоглаголанием, Скверноприбытчеством, мшелоимством, Ревнованием, завистию, гневом, Памятозлобием, ненавистию, лихоимством и всеми моими Чувствы: зрением, слухом, обонянием, Вкусом, осязанием и прочими моими грехи душевными Вкупе и телесными, имиже Тебе Бога моего и Творца Прогневах, и ближнего моего онеправдовах. О сих жалея, винна себе Тебе Богу моему представляю И имею волю каятися. Точию, Господи Боже мой, помози ми, Со слезами смиренно молю Тя: прешедшая же согрешения Моя милосердием Твоим прости ми, И разреши от всех сих, яже изглаголах пред Тобою, Яко благ и человеколюбец. В руце Твои, Господи Иисусе Христе, Боже мой, предаю дух мой: Ты же мя благослови, Ты мя помилуй и живот вечный даруй ми. Аминь.